سرزمین مصر میں جنگ

سرزمین مصر میں جنگ معروف مصری ادیب یوسف القعيد کے ناول الحرب في بر مصر کا اردو ترجمہ ہے۔ یوسف القعید 1944ء میں مصر کے ایک گاؤں میں پیدا ہوئے اور ان کے متعدد ناولوں میں مصری دیہات اور وہاں کے کسانوں ( فلاحین ) کی زندگی کو بھرپور انداز سے پیش کیا گیا ہے۔ عربی میں یہ ناول 1978ء میں بیروت سے شائع ہوا تھا لیکن اپنے سیاسی پس منظر کے باعث مصر میں 1985ء سے پہلے شائع نہ ہوسکا۔ یہ ناول ہمارے خطے خصوصا پاکستان کے پڑھنے والوں کے لیے قریبی معنویت رکھتا ہے، کیونکہ اس میں کہانی کے خدو خال جن موضوعات سے متعین ہوتے ہیں وہ جاگیرداری نظام اور اس کے نتیجے میں پیدا ہونے والی سماجی ناہمواری، طبقاتی جبر ، موقع پرستی کی سیاست اور بےحس نوکر شاہی کی سفاکی کے حقائق سے تعلق رکھتے ہیں جن سے ہمارے لکھنے والے تخلیقی طور پر بے نیاز سہی لیکن بہت سے پڑھنے والے یقینا مانوس ہیں۔ اس کہانی سنانے کے لیے یوسف القعید نے جس انوکھے ڈھنگ کو برتا ہے اس کی بدولت مصری سماج کی مختلف پرتیں انسانی زندگی کے نشیب و فراز کی صورت میں پڑھنے والے کے سامنے آجاتی ہیں، اور یہ ڈھنگ کہانی کے مرکزی کرداروں پر گزرنے والے المیے کو نہایت متاثر کن طور پر روشن کردیتا ہے۔ ناول کے واقعات جس زمانے میں پیش آئے ہیں وہ 1973ء کی عرب اسرائیل جنگ کا زمانہ ہے لیکن یہ زمانہ مصر کی داخلی سیاست میں بھی ایک خاص اہمیت رکھتا ہے۔ اس دور میں مصر کے مقتدر طبقوں (جاگیردار اور فوج ) کے بیرونی استعماری طاقتوں کے ساتھ گٹھ جوڑ کے نتیجے میں سیاست کا رخ تبدیل ہوا اور جمال عبدالناصر کے دور حکومت میں کی جانے والی زرعی اور سماجی اصلاحات کا پہیہ واپس پھیرا گیا۔ اس ناول میں جنگ کی المناک حقیقت داخلی سیاست سے اتنی مضبوطی کے ساتھ پیوست ہے کہ نہ انھیں ایک دوسرے سے الگ کیا جاسکتا ہے اور نہ ایک دوسرے کے بغیر سمجھا جاسکتا ہے۔

ISBN 978-969-8379-88-9