رقص نامہ

رقص نامہ جیم عباسی کا پہلا ناول ہے۔ اس سے پہلے ان کی کہانیاں آج اور دوسرے رسالوں میں شائع ہو کر پڑھنے والوں کی دلچسپی اور توصیف کا موضوع بن چکی ہیں۔ ان کہانیوں کا مجموعہ زرد ہتھیلی اور دوسری کہانیاں 2020 میں شائع ہوا اور اسے کہانیوں کی ایک اہم کتاب کے طور پر سراہا گیا۔ کہانیوں کے بعد یہ ناول پڑھ کر ایک طرف یہ اندازہ ہوتا ہے کہ جیم عباسی کو فکشن کی ان دونوں اصناف کی تخلیقی اور تکنیکی باریکیوں پر ابتدا ہی سے ماہرانہ گرفت حاصل ہے، اور دوسری طرف اس خیال کی عملی تصدیق ہوتی ہے کہ ایک مخصوص انسانی معاشرے کے کسی مرکزی تقسیم پر پہلودار اور تخلیقی غور وفکر کے لیے ناول ہی موزوں ترین ہیئت ہے ۔ رقص نامہ ہمارے سماج میں تاریخی اور ثقافتی طور پر رچی بسی تھیم ـ مذہبیت ـ کے کرداروں کے سماجی سیاق و سباق اور ان کی انفرادی تقدیر پر اثر انداز ہونے کے عمل کو اس کے تمام تر تنوع کے ساتھ پیش کیا گیا ہے اور اس خوبی سے کہ قصہ گوئی کا لطف کہیں ماند نہیں پڑتا۔ جیم عباسی کی کہانیاں پڑھنے والوں کو محسوس ہوا، اور یہ ناول پڑھتے ہوئے اس احساس کو اور تقویت ملے گی ، کہ ان کو اپنے ارد گرد کے مانوس ماحول کی گہری ہمدردانہ داخلی واقفیت حاصل ہے، اور وہ تفصیلات کے حساس انتخاب اور ایکشن اور مکالموں کے ذریعے کرداروں کی تشکیل کے ذریعے اس واقفیت کو پڑھنے والے تک پہنچانے کی غیر معمولی قدرت رکھتے ہیں۔ جیم عباسی کی کہانیوں اور اب اس ناول کے ذریعے سندھ کی دیہی معاشرت کی اردو فکشن میں کامیاب اور کشش انگیز پیشکش نے تیز رفتاری سے ایک مستحکم مقام حاصل کر لیا ہے۔
جیم عباسی (اصل نام جمیل عباسی ) 1978 میں سندھ کے مقام کنڈیارو میں پیدا ہوے، جو اس وقت ضلع نواب شاہ میں تھا اور اب نوشہرو فیروز ضلعے کا حصہ ہے۔ انھوں نے کنڈیارو ہی میں مذہبی نوعیت کی تعلیم حاصل کی اور وہیں پرورش پائی، اور بعد میں حیدر آباد اور پھر کراچی منتقل ہوئے جواب ان کا گھر ہے۔

ISBN: 978-969-648-061-7