سات رنگ اور ایک گیان
| تعداد | رعایت | رعایتی قیمت |
| 3 - 4 | 25% | ₨ 450 |
| 5 - 9 | 33% | ₨ 402 |
| 10 + | 40% | ₨ 360 |
بلوچستان میں اردو شاعری کی روایت کے برعکس اردو فکشن کی عمر کم ہے۔ حقیقت یہ ہے کہ یہاں محض افسانہ نگار کے طور پر اپنی شناخت بنانے والوں کی تعداد ایک ہاتھ کی انگلیوں سے بھی کم ہے۔ ان میں بھی ایسے لوگ بہت کم ہیں، جنھیں صاحب اسلوب کہا جا سکتا ہو یا جنھوں نے معاشرتی و واقعاتی کہانی کی سطح سے اٹھ کر افسانہ طرازی کی دنیا میں قدم رکھا ہو۔
خادم مرزا ایسے افسانہ نگار ہیں جو نہ صرف بلوچستان میں ایک منفرد مقام رکھتے ہیں، بلکہ اپنے فنی جوہر کی بنا پر وہ اردو کے ایک اہم افسانہ نگار کہے جاسکتے ہیں ؛ اس کے باوجود کہ، ان کا کل فکشنی سرمایہ یہی ایک کتاب ہے۔ اس کی وجہ یہ ہے کہ، خادم مرزا کے تمام افسانے ایسی گہرائی اور گیرائی رکھتے ہیں، جو اردو کے بڑے افسانہ نگاروں سے منسوب ہے۔
خادم مرزا کے افسانے جہاں اپنی تکنیک اور مواد کی بنیاد پر اہم ہیں، وہاں ان کا اسلوب قطعی طور پر ان کا اپنا ہے۔ ہندی اور سنسکرت لفظیات ومحاورات سے تشکیل پاتا ان کا تہہ دار اسلوب ایسی رمزیں رکھتا ہے جو علامت نگاری اور ماورائے حقیقت ، حقیقت نگاری سے ملتا ہے۔
ان کے افسانوں میں مزاحمتی عناصر ایک توانائی کے ساتھ مگر پوری طرح فن کے سانچے میں گندھ کر سامنے آتے ہیں ؛ اس لیے ان کے ہاں سطحی نعرہ بازی کا رجحان نہیں ملتا۔
یہ کہنا بے جا نہ ہوگا کہ صرف ایک افسانوی مجموعے کے باوجود خادم مرز بلوچستان کے نمائندہ اور اہم ترین افسانہ نگار ہیں۔ بلوچستان میں اردو فکشن سے دلچسپی رکھنے والے قارئین کے لیے اس کتاب کا مطالعہ از بس ضروری ہے۔
(ادارہ)
تبصرے
ابھی تک کوئی تبصرہ موجود نہیں ہے۔