سوکھے کچرے کا بندوبست

ایک اندازے کے مطابق کراچی میں روزانہ 6600 ٹن سوکھا کچرا پیدا ہوتا ہے۔ اس کچرے میں سے تقریبا 800 ٹن کا بندوبست گھروں پر ہی گھریلوخواتین کے ذریعے ہوجاتا ہے جو اس کچرے کو شہر میں پھرنے والے تقریبا 1500 کباڑیوں یا کچرے والوں کے ہاتھ  فروخت کردیتی ہیں۔ اس کے ساتھ ساتھ کچرا اٹھانے والے اور خاکروب وغیرہ کچرا کنڈیوں سے بھی اس طرح کی چیزیں جمع کرتے ہیں۔ سڑکوں اور بازاروں سے تقریبا 700 ٹن سوکھا کچرا اٹھایا جاتا ہے۔ یہ کچرا اٹھانے والے مقامی ٹھیکیداروں کے ملازم ہوتے ہیں۔ ان ٹھیکیداروں اور بلدیہ عظمی کراچی (KMC) یا موجودہ سٹی گورنمنٹ کے درمیان ایک خاموش معاہدہ ہے جو دونوں کے لیے فائدہ مند ہے۔ اس معاہدے کے تحت کچرا بلدیہ کی طرف سے قائم کردہ کچرے خانوں سے نہیں اٹھایا جاتا اور نہ ہی سرکاری مقرر کردہ کوڑا جمع کرنے کے وسیع علاقوں تک پہنچتا ہے، بلکہ یہ کچرے کے بیوپاریوں کے احاطوں اور کراچی میں قائم کچرے کو دوبارہ قابل استعمال بنانے کے کارخانوں تک چلا جاتا ہے۔
کراچی میں قائم کچرے کو دوبارہ قابل استعمال بنانے کی صنعت اور سوکھے کچرے کے بندو بست کے انتظام میں شامل مختلف کرداروں کے درمیان مالیاتی اور انتظامی طور پر باہمی انحصار کا نظام قائم کرتا ہے۔ اس نظام میں شامل کردار مندرجہ ذیل ہیں گھریلو خواتین جو کباڑیوں وغیرہ کے ہاتھ کچرا فروخت کرتی ہیں؛ کباڑی، خاکروب اور کچرا چننے والے جو اسے درمیانی بیوپاریوں کے ہاتھ فروخت کرتے ہیں؛ مرکزی بیوپاری جو درمیانی بیوپاریوں سے کچرا خریدتے ہیں اور ثانوی طور پر قابل استعمال بنانے کا کام کرتے ہیں؛ کچرے کو دوبارہ قابل استعمال بنانے کے کارخانے؛ اور بلدیہ کے صفائی کارکن یا خاکروب اور ان کے افسران جو معاون کردار ادا کرتے ہیں اور غیر رسمی سیکٹر سے پیسے بھی وصول کرتے ہیں۔
1991ء میں یو آر سی نے کراچی کے کچرے کو دوبارہ قابل استعمال بنانے کی صنعت اور سوکھے کچرے کے بندوبست کے نظام میں شامل باضابطہ اور بےضابطہ کرداروں کے درمیان باہمی تعلق کے مطالعے کے لیے ایک تحقیقاتی عمل کا آغاز کیا۔ یہ عمل متعلقہ علاقوں کے سروے اور متعلقہ لوگوں کے انٹرویوز پرمشتمل تھا۔ اس سے معلوم ہوا ہے کہ شہر میں سوکھے کچرے کے ہندوبست کا ایک نظام مکمل طور پر غیر سرکاری حیثیت میں قائم ہے اور سرکاری ترقیاتی اداروں سے اسے کوئی مدد نہیں ملتی ۔ اس تحقیق کی بنیاد پر کراچی میں سوکھے کچرے کے بندوبست کے ایک جامع نظام کے قیام کے لیے سفارشات پیش کی گئیں۔
موجودہ کتاب ان ہی جائزوں، انٹرویوز اور 1999ء میں یو آر سی کے تحت منعقد کیے جانے والے اجتماعات اور اس عمل سے متعلق افراد اور اداروں کے بارے میں معلومات پر مشتمل ہے۔ یہ ان علاقوں اور مواقع کی نشاندہی بھی کرتی ہے جہاں سرکاری ترقیاتی ایجنسیوں کی مداخلت اور مدد سے موجودہ نظام میں مثبت تبدیلیاں لائی جاسکتی ہیں۔

ISBN 969-8380-62-0